على شرف بثينة كامل

كالعادة طبعا مقدمة طويلة لحواري النهاردة , عنوان البوست على شرف بثينة كامل لانها خلتني ارجع اكتب وافضفض بعد فترة جفاف وقحط لغوي كبيرة اوي ,, بالذات خبر استبعادها من السباق الرئاسي كانت القشة التي قصمت ظهر البعير , وكانت اخر ضغطة عشان اطلع كمية كلام كتير عن انتهاك حقوقي كمرأة لمدة شهر ونصف في عملي في الدمرداش ,, بالصلاة عالنبي كده نبدأ نحكي كام موقف كده ونحلل

من أول يوم بدأنا فيه شغل في الامتياز في مستشفى الدمرداش , كنت بدأت قسم الجراحة , بنقسم النبطشيات والاحوال والاستقبالات واللذي منه ,, أول حاجة قفلتني لقيت النواب بيقولوا خلولي الولاد في نبطشيات الليل بلاش البنات ؟؟!!
أنا : لا انا عايزة اخد نبطشياتي كلها ليل
النايب : لا بلاش خللي الرجالة تاخد بالليل
أنا : لا انا ورايا حاجات الصبح ومصممة اخدها بالليل
النايب : خلاص خدي اللي انت عايزاه انا عامل على مصلحتك وخايف عليك
خلص الحوار ,, بعد عشرة مع النايب هو فعلا شخص كويس وبيقول كده كنوع من القلق عليا , لكن المشكلة انه مش قادر يفهم اني زيي زي الولد وهاقوم بنفس مهامه ولو حصلي اي حاجة ممكن تحصل كحادث يحصل لاي حد ,,

تاني موقف ,, أنا وولد كمان زميلي نشيطين وبنشتغل حلو اوي للنواب , وفي المقابل  بيخلونا نتعلم حاجات جديدة ونجرب بإيدينا , احقاقا للحق , فيه نواب ما بتفرقش معاهم وبيعلموا الولد زي البنت المهم يكون بيشتغل كويس , وفيه ناس تانية , لا انا عايز ولد يتعقم معايا ,, ما تفهمش متعقد من البنات ولا ايه نظامه

ثالث موقف , اكون واقفة انا و2 زمايلي وتدخل حاله ييجي النايب , يا فلان روح اعمل كذا , يا علان روح اعمل كذا ,, وطب بالنسبة ان انا واقفة زيي زيهم واقدر اشتغل بردو ,, ايه وجهة النظر ان انت مش واثق اني هاقدر اعمل نفس شغلهم , ليه  حاسس ان شغل الجراحة ده شغل للرجالة وان البنات حاشرين نفسهم فيه ؟؟!!! مين قال كده اصلا !!

رابعا طبعا لما باقف وباشتغل بيدخلوني ويعلموني حاجات لانه هيكون عيب يطنشوني كده كتير ,, بالاضافة ان اصلا الولاد اللي هما معتمدين عليهم مش بيحضروا أدي ولا بيستحملوا يصحوا ويقفوا كتير زيي ففي الاخر مافيش غيري قدامهم , كل اما اقول حاجة تلاقيهم بيتريقوا على طريقة الكلام , مع اني بشتغل حلو لكن لازم يحسسوني اني بنت سيس وبردو ماليش فيه شغلهم !!!

خامسا وده اخر موقف حسيت فعلا فيه باحساس بشع ,, جه النايب بيكلمني انا وحد زميلي هيطلب مننا طلب لبنك الدم ,, قال لا انا يا فلان الطلب ده لانه صعب محتاج راجل حد شديد ,, قلتله لا ايه الفرق يعني انا اقدر اعمل كده ,, قاللي خلاص خديه اصلا كويس انك انت اللي هتحضري دم لان استاذ فلان هو اللي ماسك بنك الدم النهاردة , المهم ان تحضير الدم كان صعب بسبب بعض الامور الادارية , وانا انجزته بسهولة , لما رجعت للنايب ما صدقش اني فعلا انجزته بسرعة وشايف انه الموظف خلصني لاني بنت وبادلع ,, وبعدين بيقولي انا لو كنت بعت ولد ماكانش هيخلصه , وبعدين مش عيب انت بتستغلي امكانياتك !!!

وقتها حسيت ان جردل ميه ساقعة وقع في قفايا ,, هو احنا بنتشاف كده ,, انت مش شايف ان انا بشتغل كويس ومجتهدة وشايف بس اني بعرف اتدلع عشان اخلص لك امورك , ايه كمية الازدراء لشخصية المرأة وحصرها في جسدها وانوثتها

الحقيقة ده خلاني اعرف ان فيه بنات بتعمل كده عن قصد فعلا !! وده يرجعنا للنقطة الأولانية خالص ,, بثينة كامل ,, مشكلة حقوق المرأة في مصر مشكلتها مش بس في الرجل الذكوري "male man " ده اللفظ اللي قلته للنايب , لا مشكلته في ان المرأة نفسها مش مؤمنه بنفسها وبنات جنسها مصر مافيهاش 30 الف مرأة متنورة مؤمنة بحقوق المرأة قدرت توفر ساعة من وقتها تعمل توكيل لبثينة كامل عشان نبقى بدأنا خطوة كبيرة على طريق المساواة وحقوق المرأة , ماعرفناش حتى نوفرلها فرصة انها تترشح ,, بثينة كامل اللي كانت واقفة سياسيا وثوريا زيها زي كل الرجالة اللي بشنبات اللي مترشحين دلوقت ؟؟!!  بثينة كامل انا باشكرك على كل حاجة , باشكرك لكونك انت , باشكر كفاحك ونضالك وان كانت معركة خاسرة , انا فعلا فخورة بك , واكيد هنشوف اليوم اللي يكون فيه لمصر رئيسة

اخر موقف كان هيجيبلي الشلل بالمناسبة مدرسة الألماني بتاعتي الست المتعلمة المتنورة اللي درست في مدارس الماني وسارفت المانيا , بتقولي ما ينفعش يكون رئيس مصر وحده ست !!!  بقولها ازاي انت امراه عاملة ولازم تدعميها ,, امال انجيلا ميركل دي ايه !!! قالتلي ده في المانيا بأى مش هنا ,, امتى ياربي نبقى زي المانيا بأى :((

عموما في الاخر ما اسمعش بأى صوت اي وحده بتقول انا بعاني من اضطهاد أو تمييز كان قدامنا فرصة ذهبية لدعم المرأة وضيعناها للاسف ,, احنا لسه قدامنا كتير اوي ,,

لكن مش هيأس ,,,

احقاقا للحق بردو عشان يكون فيه موضوعية وأمانة في النقل , بثينة كامل لسه باعتالي ان ساتبعادها وحربها ضد العسكر لانها مصممة تفضحهم وان مش لانها ست , مع اني قلتلها ان مشكلتها مع العسكر بسبب مبادءها , لكن في الكجتمع لانها ست , لكت هي مصممة انها مش أزمة مجتمع , وانها أزمة ثورة بتتقتل ,, بس المهم انها قالت اللي انا متفقة معاها فيه

هننتصــــــــــــــــــــــر