الجمعة، 24 يونيو 2011

مبروك عالحجاب,,,


تتعالى صرخات حماسية وهتافات وبلبلة بين مجموعة من الفتيات ويرددون كلمة مبروك الف مبروك وهم يلتفون حول واحده منهن وينظرن اليها بفرحة عارمة , وعيون مغرورقة بالدموع
تقول احدهم . الف الف مبروك بجد شكلك امورة اوي في الحجاب احلى من قبل كده
ثانية : ربنا يكرمك يارب ربنا يهديني انا كمان والبسه بردو
ثالثة : ربنا يقوي ايمانك ان شاء اللبس يبقى احسن بردو

تمسك اخرى بالهاتف وتحادث مجموعة اخرى من الفتيات , مفاجأة يا بنات فلانة اتحجبت خدوا باركولها بأى وادعولها بالثبات

تذهب الفتاة لعملها في اليوم التالي ونجد نفس الموجة من المباركات وصرخات الفرحة مع كلمة مبروك ايضا وتجد الجميع يسلم عليها بحرارة وفي اعينهم نظرة فرحة وفخر

مبروك عالحجاب ؟؟!!!
اكيد كلنا شفنا الموقف ده قبل كده وكتير مننا شارك في كلمات المباركة والتشجيع

انا دلوقت مش باتكلم عن الحجاب كفكرة او كفرض ديني عشان ما اسمعش بأى اتهامات الكفر والعلمانية

انا بس باثير تساؤل ليه اما وحده بتتحجب بنلاقي رد الفعل ده

يعني مثلا لما حد بيصلي او بيصوم او ما بيكدبش بنلاقي الناس بتقوله مبروك ؟!

هل ده باعتبار اننا بنفترض ان اللي اتحجب ده كده مثلا التزم اكتر او اتقرب من ربنا اكتر

وكلمة ربنا يهديك ؟ ربنا يهدينا كلنا بس اشمعنا لما لقتها اتحجبت ,

واللي بتقولها ربنا يكرمني زيك ؟ طيب مدام انت مقتنعة ان كده ربنا هداها ودي حاجة كويسة طيب اتحجبي

مش عارفة بس انا بجد المشهد ده بكل تفاصيله بتنرفزني

مش اعتراضا على الحجاب ولا اعتراضا على اراءهم

النقطة اللي عاوزة اوصلها من كل ده ان ليه مظاهر التدين الظاهرية هي الي بتشدنا  أكتر

وبنفترض ان كده الشخص بأى احسن

ولو الشخص ده مثلا كان فنانة تلاقيها طالعة في كل القنوات وبتقول افكارها وطريقها للهداية وكأنها لما لبست الحجاب بقت عالمة في الدين او بأى كلامها له معنى لمجرد انها ارتدت الحجاب

لان احيانا صاحب النظرة دي بيبص لغير المحجبة على انها اقل دينيا وده مش صح ابدا

ربنا وحده يعلم كل وحده بتلبس الحجاب ليه , ومن غير خوض في اسباب عشان ما حدش يزعل

انا عارفة ان الكلمتين دول هيثيروا حفيظة ناس كتير بس لو بصوا للمعنى الحقيقي للكلام , انه ما نحكمش بالمظهر ياما فيه مظاهر خادعة وان ارتداء الحجاب او غيره مش دليل على تدين اكتر عشان ما حدش يرجع يقول تصوروا دي محجبة وبتعمل كده ؟؟!!اللي يقول كده هو الوحيد المسؤول عن افراضه الخاطئ

طلب بس بردو ما تحملوش الكحجبة فوق طاقتها المحجبة دي بني ادمة عادية جدا بتتصرف صح او غلط وممكن تبقى كويسة او وحشة

وليس دلالة ابدا على القرب من ربنا

وبردو كالعادة انا مش بعمم  انا بس لقيت حاجة عند بعض الناس وبرصدها مش اكت رمن كده

ملحوظة : انا محجبة على فكرة




الاثنين، 13 يونيو 2011

وضاع العمر يا ولدي


عندما يمر الوقت
وتتسارع الأحداث
وينجلي الضباب
وتتضح الرؤية
لترى الحقيقة كاملة
عارية من اي لبس او خلط
مجردة من حماسك وتفاؤلك
الحقيقة كما لم ترد ان تراها
تظهر الحقيقة لتجد نفسك وحيدا
أو بصحبة حفنة من أناس شاركوك أفكارك
يظهر لك نورها ويسطع حتى يكاد يفقدك بصرك
ليكشف ضلالات فكرك
وخيبة أملك
وأحلامك المشردة
وأفكارك المتهتكة
عندها فقط تدرك أنك كنت مع معسكر الخاسرين
او المعذبين
من كتب عليهم العذاب الأبدي
من تبنوا المعركة الخاسرة
عندما ينقلب يقينك
ويصبح كل ما آمنت به ما هو الا خرافات
شعارات
أوهام
لففت بها عقلك
وسجنت بها أفكارك
أحلامك لم تصل بك لمستقبل جميل
بل تفجرت وحرقت
واصبحت رمادا تذروه الرياح
عندما تنظر لسنوات عمرك الممزقة
لترى أنك لم تحقق شيئا
بل انك أسأت لنفسك
وجسدك
وروحك
طردت من حولك لمخالفتهم لك
وكنت تظن انك تتطهر من الجهل
بالغت في حماسك حتى فاتك التحقق من القيمة
وكنت تظن نفسك مناضلا مظلوما

لم تنل من حياتك الا ذكريات مشتتة
وروح هائمة مشطورة
نظرت حولك فوجدت كل من كنت تنتقدهم أمامك
وانت خلفهم لا تملك سوى أفكراك البالية
وطموحاتك الخائبة
وعمر ضائع
وسيرة عطرة فقدت مكانها

لتجد روحك ذائبة , وضعيفة
لانها تستمد قوتها من البشر
من الأناس اللذين ظننت انهم أغبياء
لتجد نفسك أنك انت الأحمق اللذي كان يريد ان يكون وصيا عليهم
أردت ان ترسم لهم حياتا مثالية
ومستقبلا حرا
أردت لهم الكثير والكثير
نيتك الحسنة لم تكفي وحدها
كان يجب عليك ان تعلم
ماذا يريدون هم ؟
لتعطهم اياه وان خالف هواك
حتى لا تصبح منبوذا محسورا
لتجد نفسك بدلا من كونك صوت الحق والحرية والعدالة
لصوت الانانية والغباء والجدال
لاتكن ملكيا أكثر من الملك

ضاع عمرك ياولدي ,و كنت تظن انك تبنيه
لتجد نفسك قابضا على الماء
والرمال تتسرب من بين كفيك
كنت تصارع الهواء
وتحدث الصم
وسف تقف مجبرا
لتسمع كلام الناصحين والشامتين
تنزل كلماتهم عليك كالسياط
تعذبك
تصم سمعك
وتهشم ما تبقى منك
 سيتجاهلونك
سيتجاهلوا صراخك
وكأنك تصرخ خلف جدار عازل
لن يلتفتوا لتوسلاتك
خطاباتك
صراخك
أنينك
لقد مللوا منك
ومن كلماتك المقعرة
ومن طلباتك غير المنطقية
ومن أفكارك الشاردة

لا تعاند ولا تجادل
لانهم سوف يديرون ظهورهم لك ويبتسمون
ويقهقهون حتى يرتجعوا ما يأكلون ويحتسون
وانت مازلت تدافع عن قضية مات صاحبها
وأناس راضين بوقعهم
ووطن حزين صامت
ينتظر البطل
المخلص
الذي يلتف حوله الجميع
ليأنسوا به
وتظل انت وحفنتك
أقزما محسورينا

"قُلْ هَلْ نُنَبِّئُكُمْ بِالْأَخْسَرِينَ أَعْمَالًا (103)الَّذِينَ ضَلَّ سَعْيُهُمْ فِي الْحَيَاةِ الدُّنْيَا
وَهُمْ يَحْسَبُونَ أَنَّهُمْ يُحْسِنُونَ صُنْعًا (104)
سورة الكهف






الخميس، 2 يونيو 2011

Things I Hate About Public W.C


1- There is No public W.C.
2- Always Dirty and stinks 
3- mostly there is No water supply
4- Never to find Toilet paper 
5 - No door lock

سكيزوفرينيا مجتمعية


أول حاجة اسمعها سكيزوفرينا ؟؟!!!! بنظرة تعجب كده , آه المفروض اسمها كده اهي عالاقل حاجة اتعلمناها في الكلية المريضة اللي احنا فيها دي ,,
حوار الافلام العربي بتاع أصل عنده شيزوفرينيا حادة ده ده مش ذنبي , المهم من الآخر خلونا في السكيزوفرينيا دي D: D:
بصراحة أنا هاستخدم  الوصف غير الدقيق للمرض ده , كلنا فاكرين ان الشيزوفرينيا دي انفصام الشخصية , وده مش صح بس هي النقطة دي اللي أنا عايزة استخدمها
ايه كمية الرغي دي , أقصد اني عايزة اتكلم عن الكيل بمكيالين في مجتمعنا الجميل ده ,,

بالذات في موضوع الارتباط والجواز والحب وكده ,,

تلاقي الناس بتفكر وتحب بطريقة وتتجوز بطريقة تانية خااااااااااااالص !!!!

وعلى فكرة الكلام موجه للجنسين بنات وولاد ماحدش يفتكر انه ناصح عن التاني ,,

تلاقي البنت مثلا , بتفكر انها ترتبط بحد شخصيته جامده , ومثقف , وشغال شغل كويس وابن ناس , وعلى حصان أبيض و و و حاجات كتير اوي ,, مش كل البنات كده أنا بهزر :))

بس تلاقي البنت وهي عالبر تقولك أنا ما يهمنيش الفلوس أنا ممكن اتجوز حد ونبدأ سوا , وعش العصفورة يقضينا طول ماهو طيب وحنين ,, وبيحبني , وممكن الموضوع يزيد معاها وتتخطب فعلا وتفضل تقاوح مع اهلها كتير , وبحبه يا بابا وحوارات

بس ساعة الموضوع ما يدل في الجد , تلاقيها بتجيب لورا وتقولك هوا انا هافطر واتغدا واتعشا حب ,,

لا لا لا انت زي الفل وربنا يوفقك مع واحدة أحسن مني  تستحمل ظروفك ,,

نعم !!! ظروفك !! ما انت عارفاها يا بنت الناس ولا هي الظروف دي لسه أول امبارح ,,  ولا هو لما البنت تكبر  وتلاقي صاحباتها وقرايبها واخواتها والجيران و جيران الجيران واللي خلفوهم بيتجوزوا

وتسمع بأى الكلام ,, دي عملت فرحها فين , ودي جابت فستانها منين , ود يراحت شهر عسل برة , ودي جابت شقتها بكام , ,,

تنسى كل أفكارها وحبها وتمسكها عشان بس تبقى اجتماعيا شكلها كويس

هو انت بتتجوزي لنفسك ولا للناس يا حاجة !!1

ما عليــــــــــنا عشان احنا قطعنا في البنات كتير نيجي بأى للولاد , بالذات الذكوريين منهم  , مش عايزة نفس نظرة التعجب , آه في ولاد ذكوريين وولاد لا ,, وده موضوع يطول شرحه هنقوله مرة تانية ,,  اختصاره ان فيه ولاد شايفين نفسهم ذكور بس وفيه ولاد شايفين نفسهم رجالة ,, وده فرق كبيــــــــــــــــــــر أوـــــــــــــــى

الولاد بأى , تلاقيه أول ما يعجب بواحدة ,  يقولك شكلها حلو ومهتمة بنفسها وشيك , بتلبس عالموضه , ولو مش محجبة تلاقيه بيوصف في جمال شعرها , وبعدين يقولك بنت ناس , وشاطرة , وبتشتغل ومعتمدة على نفسها , بتشيل مسؤولية وجدعة , ومثقفة , وفرفوشة , وتلاقيه هيسجد شكر لربنا ان لقى الكنز ده ,,


تلاقيه عمال يحب فيها ويبقى مش عارف يعملها ايه عشان ترضى , ناقص يجيبلها حتة من السما , وأول ما يخطبها أو يصاحبها مثلا , تلاقيه فجأة عايز يتنطط على اي حاجة بتعملها
فجأة بعد ما كان معجب بشياكتها , انت كده اوفر وشكلك ملفت وأنا بغير وبغلي أما حد يبصلك كده ولا كده
وهي عشان ده بيرضي غرورها بتعديه

تيجي تعمل مشوار ولا عمل تطوعي او خروجة مع صحابها يقولها انت مش مهتمة بيه , واذا كنا مش هنعيش يومين الخطوبة او الصحوبية هنعيش امتى ؟؟!!
بردو تعديها باعتبار انها بتوحشه وكده

آخر حاجة لو فضلت تروح وتيجي معاه يقوم يشك ويقلق , ويقولك دي سايبة السايب في السايب أنا مش مطمنلها ويروح خالع ,,!!!!

بعد ما البنت اللي كانت فتاة أحلامه , بقت فجأة والعياذ بالله أنا مش مطمنلها !!!!

واذا كانت البت ناصحة وتقتلت عليه حبتين , لحد ما يتجوزوا

أول ما تتجوز , لا لا لا شعر ايه وشياكة ايه ؟؟ انت لازم تتحجبي , لو بتحبيني اصل انا بغير

وبعدين ايه اللبس ده , البسي واسع هو انت يعني هتتشيكي ليه ؟ هتتجوزي تاني مثلا ؟؟ لالا اصل أنا حمش وعارف الراجل بيبص للست ازاي " الظاهر الأخ خبير بصبصة "

وخروج مع صحابك ايه وماما ايه وعمل تطوعي ايه ؟؟ انت اصلا هتسيبي الشغل ,, انت فاضية اما تبقي تطبخي عدل ولا تاخدي بالك من العيال ابقي اشتغلي , مكان الست بيتها !!!!

يا راجل , امال الاعجاب بنشاطها وتحقيق ذاتها ده كان ايه ؟؟؟!! شعارات !!

طب انت بتتجوزها ليه ؟؟ مدام عايز تغيرها ,, عذاب وخلاص ؟؟  ما تسيبها يا أخي تشوف نصيبها حد يقدرها فعلا

وفيه ناس بتعمل كده فعلا بعد أم يعيش قصة الحب التمام مع البنت الجامدة دي ساعة الجواز

لا لا لا انا عايز استقر , اتجوزلي واحدة هادية كده تقعد في البيت تاخد بالها مني ومن العيال وتطبخ وتروق كده وما تخرجش من البيت ألا عالقبر  ,,

الباشا ده عايز خدامة مش زوجة ,,

ممن الاخر بأى عشان ماحدش يزعل مني طبعا الكلام ده مش عام وقطع لسان اللي يعممه , بس الكلام ده للاسف بيحصل , وكلنا بنشوفه , في عيلتنا , مع جيراننا , صحابنا ,, زمايلنا ,, ده واقع

لو حسيت ان الكلام ده لمسك حاول تفكر بشكل مختلف , انت كمان فكري فيه ,,,

ياريت نبقى على اد المسؤولية في تحمل خيارتنا

ياريت نحب بالطريقة اللي احنا عايزين نتجوز بيها بلاش السكيزوفرينيا المجتمعية دي ,,,

وربنا يتمم بخير :))