الثلاثاء، 14 أغسطس 2012

للنساء فقط



كل سنة وانتوا طيبين عارفة انها متأخرة حبتين لكن أهو اللي حصل , من أول رمضان فيه حاجات كتير اوى عايزة اكتب عنها لكن مش عارفة مكسلة او مافيش وقت , اليوم في رمضان قصير جدا مهما كان طويل , لعنوان مكتوب للنساء فقط أ:يد هلاقي الوزلاد هيموتوا ويعرفوا فيه ايه , عموما الموضوع ده موجه للمجتمع ككل , اللي اقصده هيتفهم من الحكاية الجاية ,  ما علينا اللي استفزني اني اكتب النهاردة حاجة شفتها في الشغل . 
دخلت حمام الشركة اللي باشتغل فيها بصيت في الباسكت - بتاع الحمام - لقيت علبة عصير وورقة كيك , وانا طالعة استغربت جدا قلت في بالي سلل الزبالة اللي مرمية في كل حته في الشركة حبكت يعني تترمي كلب العصير في الحمام , في لحظة افتكرت اننا في رمضان , جه في بالي على طول السيناريو القديم والممل اللي بتعمله كل البنات في رمضان .
فيه حاجة طبيعية وفسيولوجيه لا عيب و لا حرام بتيجي للبنات اسمها - الدورة الشهرية - في الفترة دي في الاسلام للبنات الصايمين , بيبقى لازم انهم يفطروا ما ينفعش يصوموا , فعرفت ان اكيد علبة العصير والكيك دول كلتهم بنت عندها عذر شرعي انها تفطر لكن - في الحمام - طبعا البنت اضطرت انها يا عيني تاكل في الحمام لانها مش قادرة تفطر قدام الناس الناس , لان طبعا كده الناس هتعرف انها عندها الدورة الشهرية زي ما تكون بتعمل حاجة غلط او عيب , المشكلة مش في ان البنت بتتكسف , المشكلة كمان في اللي حواليها اللي هيحسسوها انها عملت مصيبة سودة وانها قليلة الأدب وفاجرة لو عملت كده .
نسيبنا بأى من الموقف ده بالذات , هو احنا ليه محملين البنت في مجتمعنا عار انها بتجيلها الدورة زي ما يكون عيب ولا حرام , هو فيها ايه لما البنت يكون عندها الدورة ببساطة ما تروحش تصلي وتقول ان عندها عذر مش تروح تقف جنب - الجزم - في الجامع او المصلى , ايه المانع انها تفطر تاكل او تشرب لو مش صايمة , ايه اللي يكسف انها ممكن تاخد فوطة من شنطتها في ايدها زي ما تطزن بتاخد باكو مناديل بدل ما تشيل الشنطة كلها عشان تخبيها فيها , ليه اما تكن متعصبة او متضايفة بسبب متلازمة ما قبل الدورة اللي بتخلي البنت حزينة شوية تقول ببساطة سيبوني انا متضايقة عشان هتجيلي الدورة الشهرية , هو ليه الموضوع ده حكر عالستات , ده باعتبار ان الولاد او الرجالة مش عارفين مثلا .
ببساطة الموضوع جده مرتبيط جدا بان البنت في المجتمع الشرقي - عار - والحاجات الخاصة بيها تبقى عار زيها ومش لازم حد يعرفها , دي حاجة مش بإيدها لازم المجتمع يتعامل بطبيعية مع الموقف ده وما يحسسش البنت انها بتغلط في حاجة غصب عنها وما حدش يقولي ان عشان انت دكتورة وانتو في المجال ده عندكوا الحاجات دي عادية ,  في الاسلام كانت السيدة عائشة بتفتي للستات والرجالة في أمور الغسل والجنابة , ولا حياء في الدين عشان ما حدش يقولي الكلام ده صياعة وقلة أدب ما الشيوخ طول النهار في التلفزيون بيتكلموا في الطهارة والحائض وماحدش قالهم حاجة .
ياريت نفكر حبتين من غير أحكام مسبقة  , كل سنة وانتوا طيبين :)