الخميس، 12 يونيو 2014

علامات الجمال


كتير مننا لو سألنا ولاد أو بنات على علامات الجمال عند البنات هتلاقي الاجابات المعتادة , انها تكون بيضا بشرتها صافية شعرها ناعم  جسمها منحوت بطنها مشدودة رجلها وايديها ناعمة شوية مواصفات كده الولاد بيدوروا عليها في البنات والبنت بتحاول تكتسبها سواء بكريمات او رياضة او ماكياج او حتى عمليات تجميل .
لكن منظوري انا لعلامات الجمال ده حاجة تانية خالص الناس بتشوف ان البياض وصفاء البشرة ده قمة الجمال وتلاقيها بتحط بتاع تلات اربع كريمات واحد واقي من الشمس التاني عشان البقع والتالت عشان الحبوب والرابع عشان النضارة ده غير الماسكات وخلافه حاجات كده مهولة عشان ما تسمرش وتحافظ على وشها جميل ولا الهالات السودا بيحطولها سبعتلاف كريم ولا في فايدة
ده للوش بس اما الشعر بأى بردو له كمية كريم تسريح وكريم ضد الحرارة قبل السيشوار وحمام كريم وحمام زيت وقصات عن الكوافير ومكوة فرد ومكوة تجعيد وبلاوي
نيجي بأى للجسم هنلاقيها بتعمل دايت على طول حتى لو وزنها مزبوط وتروح تدفع اشتراكات جيم ونادي وكريمات بردو لتنعيم الجسم وازالة شعر وكريمات للسلوييت ولعلامات التمدد
حتى بتوصل انهم يعملوا عمليات للتخسيس وشفط دهون وشد بطن وتكبير ثدي وغيره وغيره
بتوصل احيانا انها بتلجأ لعمليات كمالية تماما يعني جسمها ووزنها مزبوط لكن تروح تعمل تكبيير او تصغيير للثدي من غير اي داعي او انها تغير شكل مناخيرها لمجرد التغيير .
الحقيقة انا شايفة الحكاية غير كده خالص ....

سمار البنت من الشمس ده علامة جمال البنت اللي بتنزل في الشمس عشان تروح كليتها او شغلها , المهندسة اللي بتقع تتنقع في الشمس في الموقع , او مندوبة المبيعات اللي بتمشي تلف في الشمس , الطالبة او الموظفة اللي بتقف تستنى الاتوبيس عالمحطة سمارها من الشمس ده بيظهر جمال قوتها وطموحها , تحقيقها لذاتها ومشاركتها في مجتمعها وفي شغلها.

الهالات السودا اللي مضايقاك دي علامة جمال بنت سهرت عشان تذاكر وتطلع الاولى سكرتيرة سهرت تكمل شغلها او ام سهرت على ابنها العيان.

الشعر النظيف الملموم ده علامة جمال عشان الطالبة او الموظفة او ربة البيت اللي هتضيع كل يوم ساعتين عشان تسبسب وتفرد شعرها وتجرب وصفات الدنيا والاخرة مش هتلحق تذاكر ولا تشتغل مدام طول النهار بنسشور شعرنا وطول اليل خايفين عليه ليبوظ يا ستي اغسلي شعرك ولميه وريحينا شعرك الملموم ده اللي مش بيتعمل غير في المناسبات علامة اجتهادك وجمالك انك بتستغلي وقت الكوافير انك تقري كتاب او تذاكري او تاخدي اوفر تايم تساعدي جوزك.

الست اللي واقفة طول اليوم سواء الطالبة اللي واقفة طول السكشن عشان تتعلم الدكتورة اللي واقفة طول النهار في نبطشية ست البيت اللي واقفة في بيتها طول النهار طبخ وغسيل ونشر لازم يجيلها دوالي رجليها مش هتبقى رجلين شاكيرا الدوالي  اللي في رجليك دي علامة جمال بتبين صلابتك وتحملك لشغلك وبيتك.

الست اللي ولدت وعندها علامات تمدد او اللي حملت وولدت تلات اربع مرات ورضعت قدهم طبيعي هيجيلك ترهل في البطن وعلامات تمدد وترهل في الثدي او يجيلك فتاق في جدار البطن كل الحاجات دي علامات جمال جمال امومتك وحنيتك جمال احتمالك الحمل والولادة والرضاعة جمال قوة ام ربت وتعبت وسهرت.

اللي بقوله ده عمره ما يكون مبرر لاهمال الست لنفسها مافيش وحده ما تحبش تكون حلوة في عين الناس او في عين صاحباتها او جوزها حتى في عين نفسها كلنا وانا اولكم بستخدم كل الحاجات اللي قلت عليها فوق لكن كل شئ بحساب الجمال مش بالحركرك كده ما تضغطيش على نفسك وتضيعي وقتك وفلوسك عشان تبقي شبه فلانة او زي علانة بالعكس خليكي فخورة بأثر الحياة عليك .

كلمة للبنات والستات لكل مقام مقال دلعي نفسك من وقت للتاني , اهتمي بنظافتك على طول البسي معتدل في شغلك مافيش مانع تعملي شعرك اما تخرجي او في المناسبات ماحدش قاعد طول اليوم بقصة مسبسبة حطي ماكياج لجوزك وانت رايحة سهرة او خروجة مالوش لازمة ماكياج السهرة اللي بيتحط ليل نهار اللي ماحدش يعرف لون وشك الطبيعي من غيره , اهتمي بجسمك ورشاقتك روحي الجيم بس ما تكروتيش شغلك عشان تروحي الجيم وما تعمليش عمليات مالهاش لزوم وتاخدي ادوية عشان كام جرام زيادة حطي كريمات واهتمي ببشرتك لكن ما تضيعيش فلوسك على الحاجات دي وتأزمي نفسيتك عشان حبة ماحدش شايفها غيرك  البسي شراب دوالي وخدي علاج بس مش تجري على عملية مش ضرورية على حاجات مش باينة اصلا اهتمي بنفسك وروحي الكوافير ونادي صحي من فنرة للتانية بس ما تبقاش دي كل حياتك يا لوزة , عندك شغل وبيت وولاد ما تجيش عليهم عشان تبقي هيفاء وهبي .

اخر كلمة بأى للولاد اللي بس بيدوروا عالبيضا ام شعر ناعم وجسم مشدود وبشرا صافية وحاطة ماكياج كامل على طول هتلاقيها بس دي مش هتشارك الحياة معاك دي انتيكة تحطها في الصالون تتفرج عليها بس.