الاثنين، 5 يوليو 2010

كوب العصير الذي افسد يومي

اليوم كان جميل ؟؟!! آه كان فعلا جميل زي ما بيقولوا كده ما فيش احلى من الميه والهوا والوجه الحسن ,, بدأته الصبح بدري وقابلت اعز اصحابي عشان نعمل يوم ما حصلش
بدانا باحلى مكان في القاهرة ,,, عند النيل مع اننا في نص الصيف والساعة 11 الصبح يعني في عز الشمس قررنا اننا ناخد فلوكة في النيل ,, فكرة جميلة عشان نستمتع كده ونسترخي ,, الحقيقة الهوا كان جميل ونسماته خفيفة وكنا مستمتعين جدا بيه ,, صحيح لون الميه اثار الكثير من التساؤلات بيننا ,,, هيه الميه غامقة كده ليه ؟؟؟ السؤال ده اتكرر كتير اوي ,, أنا الحقيقة رديت عليه اجابة وحده ,, بسبب المجاري والقاذورات اللي بيرموها فيه ,, أظن انها اجابة قاربت الصواب ,, مع ذلك كنت بغني ما شربتش من نيلها ,, طب جربت تغنيلها ؟؟ المهم
بعد كده انطلقنا على برج القاهرة ومش وقته دلوقت اننا نتكلم عن جماله وتاريخه بس كان الهوا فيه منعش فعلا ,, والمنظر هايل ,,, بس كان الهوا ملوث جدا ومترب ,, بصراحة مش عارفة احنا عايشين ازاي تحت في التلوث ده ,, قضينا وقت جميل ,, مع محاولات صاحبتي انها تثنيني عن غناء يا حبيبتي يا مصر يا مصر ,,, فضلت اغني بردو وكنت سعيدة
حبينا ننهي اليوم ده في مكان ما روحناهوش قبل كده ,,, وكتير من أهالينا نصحونا نروحه ,,, جنينة الأسماك ....
الحقيقة الصدمة كانت فظيعة ,,, لا هيه جنينة ولا فيه اسماك ,,, ايه اللي حصل ده
مافيش ولا سمكة ولا ميه ولا اي حاجة والمكان باين عليه متبهدل وما حصلوش صيانه ابدا ,,, ليه كده ليه ,, دي في احسن مكان في القاهرة خلوها مكان جميل الناس والعائلات تروح تنبسط ,,, كلها زبالة وقرف ,,, ليه ليه
الحقيقة مشينا واحنا مصدومين جدا بس مرورنا على كوبري قصر النيل مع الهوا ومنظر النيل هون علينا كتير ,,, وفعلا كان فيه سعادة على وشوشنا كلنا لحد ساعة المرواح
ودعت اصدقائي الاعزاء ببسمة وسعادة وركبت عشان اروح بس قبل اما اركب القيظ اللي كنا فيه خلاني أجيب كوباية عصير مانجو وده موسمها كمان ,,, كانت جميلة اوي شربتها وحطيتها في كيس صغير وربطته كويس ومسكته فأيدي وانا راكبة ,,, كان فيه شخص فاضل يعني تقريبا موظف في عمر والدي او اصغر كان راكب حنبي وشاف الكيس فايدي
قام قاللي ( انت محتاسة بالبتاعة دي ومضايقاكي وعايزة ترميها صح ؟ )
قلتله اه بس اما انزل بأى ما فيش باسكت هنا
راح خطف الكيس مني بحركة سريعة وراج مطوحه من الشباك على الأرض ,,, وانا لسه مش مدركة الموقف وعماله اقول لالالالا
قام قايل كده بانتصار خلاص كده مافيش مشكلة


مدام هوه شايف ان مافيش مشكلة فخلاص اذا كان هوه ده تصرف الانسان المصري الناضج المسؤول برمي القمامة في الشارع ,,, فطبيعي بأى ان ميه النيل غامقة والهوا ملوث والشوارع كلها قذارة ,,, بسبب التصرفات دي وبسبب بردو ان مافيش اماكن للزبالة السبب اللي اضطرني اصلا اني امسكها فايدي ,,,
المشكلة فينا وفي الحكومة اللي المفروض تحط حاويات للناس عشان ينضفوا ,,, وهما كمان يتعلمو ما يرموش في الارض ابدا


هناك تعليق واحد:

  1. my friend nehal said that
    Nehal Ali niiice ;) .. n ya ur right its like egypt s really gr8 with everythin but the ppl r jus insistin on ruinin it n over time they r becomin numb .... but i hav 2 fav parts ... ur friend who kept stopin u from singin " which s me " :D loool n the part wen that dude did wut he did ... begad de7ekt moot :D i jus luv our lovely ppl ... jus cant stop themselves from helpin others ... THATS WUT I CALL SHAHAMA :D

    ردحذف