كان يا ما كان , فيه قرية صغيرة فيها قطط كتير , كانوا عايشين مع بعض في امان وسلام , بيشتغلوا ويلعبوا ويساعدوا بعض وكانت حياتهم هادية , كان فيهم قط جميل اوي اسمه ميشو , ميشو كان قط لطيف وشكله جميل , عينه عسلي كبيرة , ولونه زي سلاسل الدهب , كان شقي ولطيف والكل بيحبه , ميشو قبل ما بينزل الصبح بيبص في المراية وبيشوف جماله وكان بيحمد ربنا على انه اداه النعمة دي , وفي يوم أجازة والقطط كلها متجمعة مع بعض , بيتعرفوا ويلعبوا ويقضوا وقت ظريف , جت مجموعة قطط تعرف ميشو على قط جديد لسه واصل من شوية , القط ده اسمه بيسو , بيسو كان قط صغير رمادي وظريف وشقي ومغامر وكان اللي حواليه مبسوطين معاه بس كان بيسو ودنه وديله مقطوعين بس الابتسامة على وشه كانت أجمل من كل شئ , سلم بيسو على ميشو عادي , وقعدوا القطط كلهم مع بعض , كان بيسو بيحاول يتعرف أكتر على ميشو ويكلمه , بس ميشو كان بيرد عليه ببرود ومش مهتم بيه أوي , حتى مع محاولات بيسو المتكررة باللطافة ميشو بردو مش مهتم بيه .
مرت الأيام والقطط حياتها عادية بيشتغلوا ويتقابلوا ويلعبوا كمان , مع الوقت القطط اتعرفت على بيسو وحبته وخلاص بقت القطط مع بعض منسجمين بس ميشو لسه بردو ما عرفش بيسو كويس .
في يوم صبح جميل , ونسمة هادية , القطط قرروا انهم يعملوا سباق , القط اللي يحب يشارك يجيب زلاجته ويتجمعوا في نص القرية , كان ميشو طبعا من أول المشاركين , وبيسو كمان وقال تبقى بردو فرصة كويسة اني اتعرف أكتر على ميشو وهوه كمان يعرفني كويس .
وهما على خط الانطلاق بيسو وقف جنب ميشو وصبح عليه ويقوله بالتوفيق وكده , بس ميشو سمع الكلمتين بسرعة وراح جاري منطلق عشان السباق , انطلقت كل القطط في السباق وكان كل شئ تمام , لحد ما سمعوا صوت عالي من عند البحيرة , راحوا جري يشوفوا فيه ايه , لقوا ميشو واقع في الميه ومغمى عليه , شالوه بسرعة جري على البيت وجابوله دكتور , فاق ميشو والدكتور بيكشف عليه , وميشو مش عارف ايه اللي بيجرى حواليه , سامع وحاسس باللي حواليه بس مش شايف , ايه ده ؟ بدأ يصرخ انا مش شايف , أنا مش شايف , كل القطط زعلت اوي على ميشو , بس الدكتور طمنهم وقالهم دي حاجة مؤقته عشان وقع , بس مش عارفين هيرجع يشوف تاني امتى . قالهم المهم انكم تاخدوا بالكم منه وتراعوه عشان ما يحصلوش أذى . القطط قعدت تتشاور ما بينهم عشان يوشفوا مين يقعد مع ميشو . وطال الوقت بينهم وهما بيفكروا . لحد ما دخل على ميشو قط وقاله انا بسبس وجابوني اخد بالي منك . فرح ميشو ان اخيرا حد لقى وقت يهتم بيه وهوه مريض , بدأ بسبس يهتم بميشو ويساعده , وحس ميشو بالراحة اوي معاه , كان بيجيلوا الصبح بدري ياكلوا سوا ويمشيه في البيت ويعملوا طلباته , بس الوقت طول وميشو لسه ما رجعلوش نظره , ومع ذلك بسبس كان مستحمل وبيعمله كل حاجة , وكان كل ما بيزيد ملل ميشو اقترح عليه يخرجه , كان بيمسكه ويمشوا على الخضرة , يشموا النسمة الهادية ويحسوا بدفء الشمس , واكن بسبس بيجيب فاكهة وحاجات حلوة لميشو , ويقعدوا يتكلموا ويضحكوا , كان بسبس مهون على ميشو الوقت الصعب ده , وكان ميشو ممتن أوي لبسبس وحابب يعرف عنه أكتر , بدأ بسبس يحكي عن نفسه وميشو عرف ان بسبس قط ظريف وهادي وخدوم ومغامر وبيحب الحياه وقعدته مرحة وشغله كمان جميل ومسلي , ميشو لقى في بسبس مواصفات الشخص والصديق المثالي , ومع الوقت نفسه يرجعله بصره عشان يشوف بسبس ويشكره . مع الوقت بدأ ميشو يتحسن , لحد ما جه يوم , صحي ميشو وهوه بينادي بصوت عالي يا بسبس يا بسبس انا بدات اشوف , من فرحته جري ميشو من باب البيت , يااااااااااااه أخيرا شاف السما الصافيه والشمس الدافيه والخضره , ورجعله نور عنيه تاني , سجد شكر عالارض وكان بيعيط , وحس انه كان محروم من حياته كلها وهوه مش شايف ,وأول حاجة فكر يعملها ميشو انه يرجع البيت يصحي بسبس ويفرحه بالخبر , التفت ميشو وهوه راجع على باب البيت لقى قط جميل وصغير , سامع صوت بسبس بس اللي شايفه ده حد هوه يعرفه , ايه ده مش معقول !!! بيسو !! بيسو سلم على ميشو بسرعة وطلع يجري ميشو نده عليه وقالوا استنى , انت طول الوقت ده انت اللي كنت واخد بالك مني وبتساعدني , زعل ميشو من نفسه أوي , انه ظلم بيسو لانه ما عرفوش كويس و وماحبوش عشان منظره , ومع ذلك ميشو ضحى بوقته ومجهوده عشان يساعده , حس ميشو بامتنان عميق لبيسو ومن يومها وهما اعز اصحاب , وميشو بطل يحكم على الناس بمظارهم وبقى يتعرف على الناس كويس ويساعدهم بدون مقابل .
تمت
ليست هناك تعليقات:
إرسال تعليق