تأشيرة تونس الخضرا

ان شاء الله انا على وشك اسافر تونس وانا باحضر للسفر كنت شايلة الهم جدا لان كل الناس ذكرياتها عن الفيزا كانت سيئة ومعقدة , الحمد لله أنا طلعتها بسهولة وهاقول السبب بعدين لكن كنوع من المساعدة هاحاول اكتب ازا ي تستخرج فيزا سياحية لتونس من مصر

الأوراق المطلوبة

جواز السفر
2 صورة شخصية
2 صورة من جواز السفر
2 صورة من تذكرة طيران
2 صورة من حجز فندق
2 صورة من حساب بنكي بحد ادنى 7000 جنيه

وهتملا طلب التأشيرة نسختين بردو

الأوراق دي ضرورية اذا كنت هتروح للسياحة في حالات تانية ممكن تسهل استخراجها زي اللي حصل معايا

كشف الحساب وحجز الفندق ممكن تعفى منهم في حالة ان جالك دعوة من أي جهة رسمية , بالنسبة ليا بم اني رايحة تبادل طلابي فجتلي دعوة من الجامعة والمستشفى التابعة ليها

الفيزا بتاخد من 5 ايام لاسبوع

السفارة في الزمالك ورا فندق ماريوت , المشكلة ان مواعيد التقديم للفيزا ايام محددة من الاسبوع التلات والاربع والخميس من 10 ل 1 ظهرا

والاستلام من السبت للخميس من 9 - 12

بيتلم رسوم الفيزا وقت الطباعة عند الاستلام , تاشرة المرور 60 جنيه , تأشيرة الدخول 200 جنيه والدخول المتكرر بنفس السعر الفيزا بتطلع لمدة 3 شهور في حالة حبيت تخرج منها وترجع تاني

آخر حاجة أحب أقولها , بمناسبة الربيع العربي والثورات العربية ياريت ان فيزا تونس للمصريين تتلغي زي ما هي ملغية من دول زي السعودية والامارات , احنا  جيران حتى واصحاب ثورات

دي ملاحظات سريعة واللي يحب يسأل على حاجة أنا جاهزة ,, رحلة سعيدة

رشف ,, المكتبة التعاونية

رشف ,,
المكتبة التعاونية

محب للقراءة وترغب في قراءة المزيد من الكتب
ترغب في القراءة ويمنعك من اقتناءها غلو أسعارها
مللت من قراءة الكتب الإلكترونية
لديك الكثير من الكتب ولا مساحة لديك لتخزينها


إذا كنت أيا من هؤلاء , انضم ل"رشف" المكتبة التعاونية

مكتبة قائمة بالجهود الذاتية والخيرية بدون أي مبالغ او اشتراكات مالية

لكي تشترك معنا تبرع بكتابين فقط من مكتبتك , وهذا يعتبر كرت عضويتك معنا

سوف تقوم باستعارة الكتب واعادتها , لستفيد وتفيد غيرك

لن تكن مضطرا لشراء الكتاب او دفع أي مبلغ مقابل الاستعارة

في حالة ضياع أو تلف الكتب , لست مضطرا لاعادة نفس الكتاب , فقط ضع كتابا بديلا عنه

هل تحمست للفكرة ؟

هنا ملخص لكل الاسئلة التي قد تراودك عن "رشف " المكتبة التعاونية

كيف يمكنني الاشتراك ؟ بكل بساطة تبرع لنا بكتابين فقط من مكتبتك وهكذا تصبح تلقائيا عضو معنا

هل ساستعيد كتبي مرة أخرى ؟ سوف تتبرع لنا بكتب لم تعد بحاجة لها , ومقابل ذلك يمكنك استعارة ما تشاء من الكتب ماقبل هذين الكتابين

متى يمكنني ان استعير الكتب ؟ بعد تبرعك بالكتابين تقدر ان تستعير فورا اي كتاب موجود في المكتبة وتسجل بيناتك وتقراه وتعيده لنا وتستعير غيره

كم تكلفة استعارة الكتب ؟ من غير أي مقابل بمجرد وضعك للكتابين ستستعير الكتب وتعيدها بدون اي مقابل

ما الفائدة العائدة عليكم ؟ رشف المكتبة التعاونية مشروع ثقافي لا يهدف للربح يسعى لنشر الثقافة والتحفيز على القراءة

كيف يمكنني مساعدتكم ؟ ببساطة قم بالترويج للفكرة , وادعو اصدقاءك للتبرع بالكتب أيضا , وليكون المشروع لبنة تلفت الأنظار لما يجب أن تكون عليه المعرفة والثقافة ومصر بعد الثورة

أين مقر "رشف " المكتبة التعاونية ؟ جاءت فكرة مشروع ( رشف المكتبة التعاونية) لتحقق أهدافاً واضحة علي رأسها التواصل مع المصريين في جميع محافظات مصر وليس فقط القاهرة إلى جانب تحقيق قدر وافي من التوازن بين تلك المدن وباقي المحافظات و لذا نسعى لتوفير مقار في كل المحافظات , ويمكنك مساعدتنا بتوفير مقر ليستضيف المكتبة التعاونية

هل توفر المكتبة خدمات أخرى ؟ كلما زادت مشاركتكم كأعضاء زاد الابداع وتنوع الافكار وسيتم الارتقاء بالمشروع ليكن منتدى ثقافي كبير بلا تكلفة يهدف لنشر الثقافة وتواصل الاعضاء وتبادل الكتب , لان مصرنا بعد الثورة تستحق أكثر من ذلك

راس النعامة

معلش انا عايزة ابدأ بمقدمة طويلة حبتين بس مهمة للنقطة اللي هاتكلم فيها , النهاردة كنت في نموذج محاكاة لمنظمة الصحة العالمية , في الجلسة اللي كنا فيها بنستعرض حاجة اسمها MDGs , هي عبارة عن مهام حطتها منظمة الصحة العالمية عشان تنفذها بحلول سنة 2015 , المهم واحد من المهام دي مكافحة مرض الايدز " AIDs , HIV " من خلال استعراض بعض المعلومات عن المرض كان في احصائية عن مصر هاكتبلكوا تفاصيلها

ان نسبة اصابة الايدز في مغايري الجنس 49 %  وكانت اول طريقة للاصابة في مصر  ونسبة الاصابة في مثلي الجنس 22 %  , 12 % نسبة الاصابة في مرضى الغسيل الكلوي , وعن طريق نقل الدم 6 %

لو تأملنا في الأرقام دي شوية هنفهم 3 حاجات


- ان انتقال المرض في مصر مع مستوى الرعاية الصحية مش مثالي بس تعتبر اقل بكتير من الطرق التانية

- ان نسبة الاصابة في مثلي الجنس تقريبا نص نسبة نغايري الجنس يعني الصورة النمطية  ان اول ما نسمع ايدز نفتكر انه من الوحشين مثلي الجنس دي نحاول نغيرها , ومعلومة أحب اضيفها ان كتير من مثلي الجنس بسبب وعيهم بوضعهم بيبقوا احرص من الناحية الطبية على استخدام الواقي وبتبقى معرفتهم عن الجنس الامن اكتر من مغايري الجنس

- تالت نقطة بأى ودي المهمة ان أكتر نسبة واول طريقة هي عن طريق ممارسة الجنس , بين الرجل والمرأة مغايري الجنس , ده بيفتح عنينا على نقطة اننا عندنا ممارسات جنسية غير آمنة بتحصل وغالبا بتبقى ممارسات خارج الزواج .

لو فضلنا مغمضين عيننا عن النسبة دي هتزيد لاننا ما عندناش احصائيات كفاية عنها لاننا قانونا وشرعا مش معترفين بممارسة الجنس خارج اطار الزواج , او ممارسة الدعارة

أنا دلوقت مش باعمل دعوة لتقنيين الدعارة او باحفز على قبول ممارسة الجنس خارج اطار الزواج عشان ما اسمعش كلام مالوش لازمة

كل نقطتي اننا ما نبقاش زي النعامة وندفن راسنا في الرمل ونهرب من مشكلة , لازم اللي بيمارس حياته الجنسية يكون عارف يعني جنس امن وياخد احتياطاته يمارسه داخل اطار الزواج خارجه دي حريته تبعا لاخلاقه وعقيدته

بالنسبة لوزارة الصحة والهيئات الحكومية مدام انا عارف ان فيه اماكن لتجارة الجنس ومش عارف اعمل معاها حاجة يبقى على الاقل ارصدهم لمجرد مكافحة المرض والجزء القانوني ده يبقوا يحلوه بمعرفتهم , لكن انا اغمض عيني عن مصدر لانتشار المرض لاني مش معترف بيه قانونا فده مش عارفة اسمه ايه .

أنا بالنسبة لي لما يكون عندي مشكلة وهي أمر واقع وموجود فإن تقنينها افضل بكتير من اني اتغافل عنها او امنعها تماما فتضطر الناس تمارسها في الخفاء وتؤدي لكارثة زي انتشار الايدز بسبب ممارسات غير صحية لاننا غير واعيين طبيا بالاضافة اننا بندفن راسنا في الرمل من مشكلة احنا عارفينها ومش عارفين نواجهها.

حكم الأغلبية

النهاردة وأنا مروحة كانت زحمة القاهرة خانقة , والشوارع واقفة تقريبا اقبال الناس المهول عالانتخابات مجلس الشعب مخلي الوصول لاي مكان صعب حتى الشوارع مافيهاش اصلا وسائل نقل ولا اوتوبيسات ولا تاكسيات ولا اي حاجة , شوية كده وجه سي تي ايه فاضي وهيروحنا المهم ان السي تي ايه ملتزم بخط سير معين لازم يمشي , بعد ما الناس ركبت وهي عارفة خط سيره , بسبب الزحمة السواق فكر انه ياخد طريق مختصر , قعد ينادي ويعلي صوته حد نازل في النص ولا امشي من سكة تانية , وعمال يقول بلغوا بعض عشان ماحدش يرجع يشتكي , الغريب بأى ان فيه ناس ردت بمنتهى التلقائية من غير ما تعرف راي غيرها , لا مافيش امشي على طول ,,
طب مش فاهماكوا يعني ايه وجهة النظر انكوا تتغافلوا عن رأي الباقي ازاي معظم الناس عشان نازلة في الاخر تاخد قرار كده نيابة عن الغير بمنتهى التسرع !!!

المهم واحد وقف قاله لا انا نازل في النص طبعا المفروض والطبيعي والصح انه السواق يمشي في سكته العادية , حتى لو كانت ازحم هو ليه خط سير معين وانت ما نبهتوش قبل ما يركب انك هتغير سكتك يبقى لازم تلتزم بطريقك

الغريب بأى ان الناس جتلها موجة من الهمهمة والتذمر ,,, يا اسطى السكو زحمة ورانا اشغال , احنا كده مش هنلحق نروح , يا استاذ ما تنزل الاخر وخرم من المنطقة الفلانية , بعد مضي السواق في سكته النس بقت بتبص للراجل على انه مذنب , وعمالين يلقحوا طول السكة عالزحمة ,,

ايه الموقف الغريب ده ؟؟!! يعني المرفوض انه ينزل مثلا عشان انتوا تمشوا سكة مختصرة , المفروض انه يخاف ويقبل نص حل عشان انتوا اكتر منه وعمالين تلقحوا عليه وتبصوله شزرا ؟؟!! ولا انه يكون لطيف بالنسبة ليكوا ويسكت على حقه وينزل معاكم وخلاص اتقاءا للمشاكل ؟!!

الموقف ده فكرني دايما ان حكم الاغلبية احيانا بيكون ظالم ,, ليه تستقوى على الاقل لمجرد انك قوة ومعاك ناس كتير , ليه تيجي على حق الاقل والاضعف عشان انت في موقف اقوى , مش المقصود انه نمشي حكم الاقلية , المفروض يكون في قانون او شرع او اي حاجة تتفقوا عليها تحفظ حق الكل اغلبية كانوا او اقلية ,,

الموقف ده شبيه جدا بالانتخابات اللي عاملالنا الزحمة دي , الانتخابات دي فعلا ديموقراطية , بس مش دايما الديموقراطية حلوة اوي لما الكتير يجي على حق القليل , البرلمان اللي جي ده انا ماعنديش مشكلة مين هيكون مسيطر عليه , مشكلتي بس لو استخدم قوة الاغلبية دي في انه يجي على الاقليات ,

منطق قوة الاغلبية ده مش صح اللي اغلبية النهاردة او في مكان معين , بكرة او في مكان تاني هيبقى أقلية وهيعاني من نفس الظلم ده , لو فكرنا بالطريقة دي عمرنا ما هنظلم حد لاننا كتير , بمبدأ الكترة تغلب الشجاعة .

بمناسبة نفس الموضوع ده النهاردة عاشورا " كل سنة وانتوا طيبين " اول عاشورا يجي في مصر بعد رحيل المخلوع , فبعض الشيعة في مصر اقاموا احياء للحسينيات عند جامع الحسين في مصر القديمة ولاول مرة يكون عندهم القدرة على الاحتفال بشعائرهم في مصر بعد رحيل رأس النظام , فوجئت بخبر فضهم والقبض على بعض منهم اثناء الاحياء , طب ليه هل لمجرد انهم قليلين واحنا مش فاهمين هما بيعملوا ايه او لمجرد انهم مش زينا خفنا وقررنا نفضهم بالقوة , لو خالفوا القانون في اشغال طريق او اذية للناس بلغهم وامنعهم بهدوء غير كده سيبه يمارس شعائره براحته بس لاننا احنا كتير وهما قليلين سيطرنا على الوضع

شوفوا في يوم واحد اتعرضت ل 3 مواقف مختلفة لحكم الاغلبية وال 3 كانوا " ظلم الأغلبية " الديموقراطية لو ماكانش مصاحب ليها قانون وحفاظ على حقوق الكل هتبقى ظالمة لبعض الفئات ,, من الاخر كده التمييز ضد الاقلية سواء كانت على اساس ديني او سياسي او اجتماعي جريمة و زي ما لازم يكون فيه قانون واضح ويطبق بنزاهة , لازم بردو الناس من نفسها ما تتعاملش بالمبدأ حط نفسك مكانه لو كنت اقلية , عشان يكون في مساواه وعدل بين الناس وبعضها ,,

رقصني يا جدع

من فترة كده لقيت هوجة على تويتر بين الناس على قناة للرقص الشرقي مش هاقول انها اسمها قناة التت عشان ما اعملش دعاية :P :P
بغض النظر عن الاسم انا مش عارفة معناه لو حد عرف يقولي ,, طبعا كان معظم تناول الناس لخبر القناة كان ما بين سخرية واستنكار ونقد , طبعا ظهور القناة كان مصاحب لغلق مكتب الجزيرة في مصر فكانت التعليقات عالخبر مثيرة للسخرية أكتر ,, بالذات في ظل الثورة والاوضاع في البلد ,,,

أنا كلامي دلوقت مش على القناة دي خالص لا أنا بتكلم على فكرة الرقص الشرقي ليه دايما لما بتيجي في بالنا كلمة رقاصة , بيجي في بالنا على طول , وحده عريانة , في كباريه , وناس مسطولة وجو كده مش ولا بد ,, وكتير مننا تلاقيه بيقول استغفر الله العظيم بعد اي كلمة لرقاصة وبنتحاشى في كلامنا اننا نقرب من الموضوع ده خالص ,, ودايما فكرتنا عن الرقاصة دي انها وحده ملعب كده وماشية في سكة غلط ,,

صح ولا لا مش ده اللي فكرتوا فيه اول ما جت سيرة الرقص , ليه ما نفكرش بشكل مختلف ,, أنا شايفة ان الرقص ده فن و ومهارة فعلا فعلا , زيها زي الجمباز او السيرك أو أي حاجة بتعتمد على الابداع بحركة الجسد مش اي حد يقدر يعمل كده بشكل يمتع الناس , ليه عادي بنروح السيرك ونتفرج عالالومبيات بس نتكسف نتفرج على رقاصة ؟؟!!  الرقص عند دول كتير زيه زي الغنا والتمثيل ليه انواع واصول ومدربين وحترفين ومسابقات , وكل واحد بيعجبه نوع معين سواء البريك دانس , هيب هوب , سالسا , تانجو وحاجات كتير اوي اشمعنا بنيجي عند الرقص الشرقي ونقف ونقول عيب ونقلب وشنا ؟؟!!!  عشان الصورة النمطية اللي خدناها عن الرقاصة من الافلام او المجتمع انها وحده بتبيع جسمها ومش محترمة

من جهة تانية , انا بلوم جدا على الرقاصات اللي بتتدشق ان الرقص فن ومع ذلك بترسخ الصورة النمطية للرقاصة اللعوب , ليه بدلة الرقص لازم تكون مكشوفة اوي كده ويكون مقصود بيها الاثارة بمفاتن الجسد مش بفن ودقة الحركات , ليه الرقص بيمارس في أماكن مش مريحة لكل الناس ليه مش على مسرح زيه زي فرقة الرقص الشعبي كده , ليه في رقاصات بيمثلوا ادوار راقصات في افلام بتبين صورتهم زي الزفت  , يبقى ما يرجعوش يعيطوا بأى ويقولوا مجتمع ظالم , ليه الرقاصة ما تلبسش بدلة رقص تتيح ليها حركة مناسبة عشان نبيت تميزها في الرقص مش لازم تبقى مثيرة كده , وده يبقى شغلها من غير كل الحبشتكنات التانية دي وتبقىزيها زي راقصة الباليه او الرقص المعاصر اوي اي نوع تاني

نقطة كمان في نقطة تحول في المجتمع خلانا مش متقبلين فكرة الرقص الشرقي اكتر افتكر ان فيه شريط فيديو لفرح عمي كان فيه 3 رقاصات ,,  دلوقت مافيش فرح حضرته فيه رقاصة وحده , مع ان فكرة المجتمع عن الرقص وحده على مر الزمن يعني زمان الرقاصة ما كانتش محترمة ولا حاجة بس كان المجتمع اكثر تقبلا لفكرة تواجد الرقاصة للترفيه .

انا عندي كذا سبب للحكاية دي بس هاسيبكم انتوا تقولوا السبب اللي يريحكوا عشان ما ازعلش حد

عموما أنا عن نفسي صريحة مع نفسي أنا بستمتع بمشاهدة الرقص الشرقي لما تكون الراقصة محترفة ومتميزة مش راقصة تعري انا مش بنبسط من جسمها , انا بقدر حركاتها ,, على فكرة فيه ناس كتير زيي كده بس هتلاقيهم ما بيقولوش كده بيتكسفوا , بيتفرجوا من ورا  بعض بيحبوا يشوفوا الرقاصة بس قدام النسا يقولك استغفر الله العظيم وايه المسخرة دي !!

فالعقليات اللي في المجتمع ده مش غريب انها يتفتح فيها قناة للرقص الشعبي وتتقفل قناة الجزيرة ,,, وان الناس ما تأيدش الثورة ايو يعني وفيلم شارع الهرم يجيب اعلى ايرادات ,, مش هو ده اللي عايزه الزبون ولا ايه ؟!!!!

انا مش بنتقد على فكرة كل واحد براحته  تأييد الثورة مالوش علاقة بالرقص الشرقي :))

سلام مربع بأى :))

ما يحكمشي

ما يحكمشي كلمة أكيد سمعناها كتير في مجتمعنا المصري , او بنقولها او على الاقل سمعناها في الافلام العربي ,, الكلمة دي بحس انها معبرة اوي في مواقف كتير ,, قعدت اسأل وادور كتير اوي عن اصل الكلمة او امتى اتقالت بس ما عرفتش ,, المهم ايه حكاية ما يحكمشي دي ؟؟!! الفكرة اني لقيت الكلمة دي معبرة اوي عن فكرة بقالي فترة عايزة اكتب عنها فكرة الحكم عالناس ,,,
معظمنا زنسبة كبييييييرة اوي مننا بنحكم عالناس طول النهار مش سايبين حد في حاله بنحكم على مظهره , لبسه , شكله , تصرفاته , اخلاقه , شغله ,, والمشكلة اننا مش بنقول كلام موضوعي ابدا بالعكس بنحكم على دواخل ونوايا وامور ظاهرية ,,,
وماحدش يقولي ده نقد لا النقد معناه انه ممكن يكون ايجابي او سلبي لكن هتلاقي حكمنا عالناس دايما بالسلب ,,, ودايما فكرة الحكم عالاشخاص مرتبطة بالصور النمطية اللي بنكونها مسبقا عن الناس

يعني مثلا ,, اللي مربي دقنه يبقى شيخ
واللي بيشرب سجاير يبقى واد فلتان
اللي محجبة تبقى مؤدبة
واللي لابسة قصير تبقى قليلة الأدب

حكمنا عالناس من مجرد حاجة واحدة بس احنا شايفينها ما نعرفش دواخل البشر ايه مش ممكن يكون " الشيخ " ده مربي دقنه رياء مثلا , واللي بيشرب سجاير ده شخص كويس جدا ويعتمد عليه

مش المحجبة دي ممكن تكون محجبة غصب عنها واللي لابسة قصير دي بني ادمه عادية جدا وكويسة

المشكلة ان حكمنا مش بس بينحصر في فكرنا ده لا احنا بنوصله للناس اللي حوالينا وبنتصرف معاهم على الاساس ده

يعني مثلا لو حد صاحبك او زميلك في الشغل او جارك بيعمل تصرف انت مش عاجبك ,, بس بيعاملك كويس وبيقف جنبك في الازمات وبيصبح عليك ويبتسم في وشك ,, ليه تغير تعاملك معاه او تاخد منه موقف ؟؟؟!!!!

لو بتحبه هو له عندك النصيحة اديهاله لو ماقبلهاش خلاص خليك في اللي يخصك معاه ,,

انا لسه عندي كلام كتير اوي اوي في الموضوع ده واكيد هاكمل كتابة فيه لانه مهم ,,,

افتكر مرة في كورس عن التفكير الابداعي كان اول خطوة لازم نتعلمها اننا لو عايزين نبقى مبدعين في افكارنا ,, أهم حاجة اننا ما نحكمش عليها وهي لسه في دماغنا ,, نقولها حتى لو كانت مش منظقية ده هيدينا فرصة اننا نظلع بحاجات جديدة وطريفة ,, لو حكمنا على كل حد من منظره بس او بسبب حاجة ظاهرية هنفقد اننا نعرف جوهره الحقيقي بيفكرني بجملة للم تيريزا
“If you judge people, you have no time to love them.”  تقصد اننا لو فضلنا نحكم عالناس مش هنلاقي وقت نحبهم ,,, يماما ناس انا شخصيا لو كنت سبت نفسي لحكمي المظهري الغبي عنهم كنت فقدتهم ناس دلوقت من اعو اصحابي او على الاقل اثروا فيا وفادوني او لعبوا دور معين في حياتي ولسه فاكراهم  وعشان كده بحب الجملة دي اوي “Judgements prevent us from seeing the good that lies beyond appearances.”

اخر حاجة ياريت ما نحكمش على ناس احنا ما نعرفش طروفهم  “Never judge a man's actions until you know his motives”
الله وحده يعلم ايه اللي يخلي حد يعمل اي حاجة

اخر حاجة اتمناها ارجوكم ارجوكم ما تحكموش عالناس قبل ما تعمل كده المرة الجاية خد نفس كده وفكر في الكلمتين دول وفكر تاني وافتكر دايما اللي بيحكم عالناس الناس بردو هتحكم عليه " واللي بيته من ازاز ما يحدفش الناس بالطوب "


DON'T JUDGE

اخيرا ما يحكمشي وان حكم ما يتحكمشي ,,, اقعدوا بالعافية

الطبيبة الطفلة

كون الشخص طبيبا أو دارسا للطب يجعل منه دائما متلمسا للاشخاص فغالبا في مجتمعنا عندما نرى طبيبا ان نخبره بشكوى من مرض ما , نسأله عن الأعراض , نطلب منه وصفة دوائية واذا كان الطبيب صديق مقرب او جارا نلجأ اليه في الطوارئ او حالات المرض المفاجي لقيا س ضغط او تضميد جرح او حقن للدواء ,, كثير من الاطباء ودارسي الطب يتعرض لهذه المواقف بشكل شبه يومي,, مع الغرباء او الاصدقاء وحتى العائلة , لكن في بعض اللحظات يصبح الطبيب مجرد مريض لا يقوى لمساعدة نفسه على ئؤ بل انه يحتاج للرعاية , الغريب ان ها المتحذلق الخدوم الذي يدلي بدلوه في كل الامراض و الأدوية نجده يطلب من والده ان يحضر له وهو عائد من العمل دواء للزكام ويترك اختيار الدواء لتفاهم الوالد مع الصيدلي , او عندما تفيق في نصف الليل بألم في المعدة تطلب من والدتك  " دواء للمغص " وتاخذه فورا دون ان تعرف ما هو نوع الاقراص ,, ويرضخ هذا الطبيب في كثير من الاحوال لوصفات الامهات الشعبية من وضع الليمون على الوجه في حالات ارتفاع الحرارة , او ان تضع جريدة تحت القميص لكي تقي صدرك من البرد , حتى الطبيبات تجدهن يستمعن لنصائح الام في اطعام صغيرها وارضاعه والتعامل مع كافة اموره الصحية ,, في كثير من الاحوال يتجرد الطبيب من وطيفته ليستمتع بحياته كشخص عادي بل بالعكس كطفل يحتاج لرعايو والديه حتى في مرضه وان كان ادرى منهم ويهتم بشؤونهم الصحية بنفسه
كثيرا ما استمتع بهذا الشعور انني مجرد طفلة بين ابوي وان كنت طبيبة فأنا الطبيبة الطفلة ,,, :)