كالعادة طبعا مقدمة مش قصيرة للاسف , دي حكاية طويلة شوية , في مشوار الطب وسنينه ياما هنشوف بلاوي , وفي الدمرداش وفي اقسام الجراحة فأكيد انتوا عرفتوا اني هاتكلم عن العنصرية والتمييز الجنسي , ببساطة كده الطب عندنا في مصر مش زي بقية الدنيا الواحد بيختار يشتغل في المجال اللي بيحبه او المجال اللي شاطر فيه , فيه شرط كمان انك تكون من نوع معين يعني مثلا تسمع كلمة مستفزة يقولك اصل ده تخصص بناتي و يعني ايه تخصص بناتي !!! لونه بمبي مثلا ؟ تكلم حد من زمايلك او النواب او حتى قرايب واصحاب يقوللي خدي تخصص بناتي حفيف كده جلديه ولا اشعة تبقي قاعدة مرتاحة , يا عم الحاج مين قاللك ان انا تعبانه , هو مش نشتغل اللي بنحبه ولا احنا اتخرجنا عشان تحصرونا في تخصصين تلاتة ؟؟
ومن الكلام المستفز بردو لا الجراحة مش بتاعت بنات , لا اللي يقولك العظم ده تخصص ولادي !!! وهنا مربط الفرس العظم هو المشكلة , عموما العظم من التخصصات اللي فعلا ناقص يكتبوا عالقسم للرجال فقط , انا شخصيا ما شفتش طبيبة عظم بنت غير وحده بس عندنا وشفتها مرة وما شفتهاش تاني - الله اعلم يكونوا عملوا فيها ايه - وحد زميلي في مستشفى تعليمي تاني قاللي انه معاهم دكتورة عظم وداينا يتريق يقولي جايه العمليات حاطة بارفان !! زي ما يكون مدام هي خدت عظم يبقى لازم تبقى - دكر - ومبهدلة وما ينفعش تتانتك يعني ,, المهم في يوم اسود قررت اني وحد زميلي نبدل التخصصات بتاعتنا هو ياخد مني شغل الباطنة اللي ما بحبوش واخد العظم اللي ضمن الجراحة والمجال اللي عاجبني اكتر , في هذا اليوم المشؤوم مش متخيلة اني كنت هاواجه التمييز الجنسي بابشع صوره وبالفجاجة دي , ندخل للنايب تقوله عايزين نبدل
زميلي : عايزين نبدل مع بعض
النايب : بنت ؟؟؟ انت صامنها هتشتغل ولا ايه ؟
زميلي : اه هتشتغل
النايب : طيب , بصي بأى هتيجي كل يوم وتنزلي كل الاستقبالات
انا : طب معلش عندي امتحان اخلصه بس وانظم وقتي وهانزل
االنايب : لا دي مش طريقة انت مش عايزة تشتغلي لا انا مش موافق دي مش عايزة تشتغل يا عم
انا : طب هانزل وحده تانية , مع دكتور فلان
النايب التاني : لا انا مش عاوز بنات !!!!
انا : ليــــــــــــــه ؟
النايب التاني : انا عنصري
طبعا انا مشيت بعدها بس محملة بكم من الازدراء مش متخيلة ليه , ازاي ترفض حاجة لمجرد جنسي ؟ هو عيب دي حاجة غلط هل مجرد اني بنت ده معناه اني مش هينفع اشتغل عظم او جراحة ؟ مين قال كده اصلا ؟!!!!
عموما انا ما سلمتش بسهولة قررت اني هانزل مع الدكتور العنصري ده مرة كده كمتطوعة عشان يعرف البنات بتعرف تشتغل عظم ولا لا ,,
فعلا اتفقت مع حد زميلي اني يديني شغل ويعلمني وفعلا اتعلمت واشتغلت كويس , لحد ما في اخر اليوم النواب كانوا متضايقين اني ماشية وعايزيني اجي كل استقبال , وكنت سعيدة اني بالبلدي كده علمت عالنايب وخليته يعترف ضمنيا انه ما يعممش تاني ان مش كل البنات ما بتشتغلش عظم او بتدلع وبتسيب الشغل
عموما دي مش مشكلة الدمرداش بس ولا الطب بس انا شايفة ان دي مشكلة ثقافة مجتمع ياريت نلغي كلمة فقط دي وندي فرصة اننا نحكم بالكفاءة ومن غير ما نعمم وندي فرصة للبنات اللي لما بيحطوا حاجة في دماغهم بيعملوها ده حتى في القرآن " إن كيدهن عظيم " فعلا
تصبحوا على عنصرية :)
